Li succi nivuri pigghiaru campu a Baharia, succi beddi pasciuti , ca parinu cunigghia, ca sunnu chini chini ri pucci ca un ti runanu risiettu ca t'arrusicanu li carni e t'infiettanu.
M'arricuardu li beddi limiuna, chi ricchizza ca purtaru, ma li succi travagghiavanu "nsutta, e cuminciariu li "mbruagghi, cu scafazzu li succi si ficiru picciuli, senza scuttati cu sururi, ma sulu cu putiri!
Io cuntu sulu chiddu chi pozzu sapiri, pi sintitu riri.
Nna stu mientri succi e pucci e "nziemmula si inchievanu i portafuagghi , e s'accattavanu i palazzi.
A prupuasitu ri palazzi, c'eranu i custrutturi ca stavanu pigghiannu u vuolu, e custruivanu, senza taliari unni, abbasta ca isavanu palazzi e facevanu picciuli iddi e manciavanu puru tutti i succi ca eranu "nfistati ri pucci.
Lu stratuneddu era chinu ri beddi putii: abbigliamenti, scarpi, elettrodomestici.
Si ci passati uora c'è a spilunca, picca putii, e negozi chiusi. Picchì?
Picchì i succi e i pucci un si putevanu scutulari ri "ncuoddu e chiuieru, c'avevanu a fari?
Trasievanu e si pigghiavanu u to piattu pi malantrinaria, o ti mittevanu u biduni ri binzina e t'abbruciavanu a saracina pi fariti scantari, allura tu dicirievi: megghiu ca chiuiu, picchì io un li pozzu campari.
Succi ra Baharia, succi ri Paliermu, ri Villabati, ri Castiddazzu, e succi stranieri ca vennu ri paisi luntani.
Santa Rusulia picchì un l'acciunchi prima ca "nfettanu i nostri paisi, ca purtanu un sulu succi ma puru pucci c'arrusicaru tuttu u paisi, un si nni po cchiù ri sta vita, un si po accittari ca surciazzi e pucci mancianu e hannu panza china e i figghi nuostr sunnu a fari i cammarieri all'estero, luntanu ri famigghi.
Santa Rusulia vui c'aviti a pinsari, sta pesti ri nostri paisi aviti alluntanari!
Pina Tomasello
