A mmia mi ficiru i scarpi n'tall'acitu
Mi rissiru vieni, iamu n‟to zuNardu a „u fierru
E io ci ivi.
Mi ficiru assittari e mi rissiru Tu hai campatu assai.
Mi misiru a cuorda 'nto cuoddu
E m‟affucaru.
Mi livaru i scarpi e puru i ruobbi
Mi calaru n'tall'acitu e mi ficiru squagghiari
A tutti na fini ci vuagghiu augurare
Io era menzu latru e menzu truffaiddu
M‟avissiru arristato e mi nn'avissi fattu cinq'anni.
Mi capitaru iddi e finivi scannatu squagghiatu
Mi ficiru i scarpi a trarimentu
I me parienti pi mmia un sannu unni addumari lumina.
Purtatili au fierru,
'nta zuNardu,
ddà mi ficiru i scarpi.
L'ESTORTO
Mi ficiru i scarpi n'anticchia a vuata
N’anticchia a vuata ci ficimu i scarpi
Avia na putia ca vuscava pi mmia e pa me famigghia
Avia na putia ca vuscava rinari
Mi rissiru mettiti in regola ca ci su i carcerati
Purtamo rispiettu pi carcerati
N'anticchia a vuata mi ficiru i scarpi
N'anticchia st'jurnata
N'anticchia rumani
E puru doppu rumani
Sulu n’anticchia, n’anticchia a vuata.
N'anticchia siempri.
Sino a che i debbiti m'affucaru.
Mi ficiru i scarpi chi appi a chiuiri a putia.
Na bella putia prima ca chiuissi.
Bellu paisi r'unni ti fannu i scarpi.
Ca io pi vriuogna m'appi ammazzari.
Si iu ammazzari ca forsi i scarpi ci rinniru stritti.
Mi ficiru i scarpi ma n‟to casciuni avia scarpi sfunnati.
Giorgio D'Amato
